芭堤雅自駕親子遊

暑假開始，要安排下小朋友出外旅行，今次選擇了泰國芭堤雅。

曼谷一年去一次，已去到悶，加上可以俾小朋友玩的地方唔多，都係shopping and shopping。老友提議去芭堤雅，佢地有多次經驗，一於跟住去。

今次老友一早訂好機票，酒店，再加埋租車。

機票無咩特別，酒店係租左有獨立泳池的渡假屋，外觀唔錯，內部裝修不算豪華，但勝在有四間獨立套房，游完水唔使爭沖涼。廚房好大，我地朝朝都自己整早餐，確有另一番風味。

另外在AVIS租車，在曼谷機場取車，自己揸車直闖芭堤雅。初時都會擔心在泰國自駕好煩，怕唔識睇路牌，原來有GPS，自駕無難度。我地租4天，折合$1500港幣，加埋$400油錢，好鬼抵。好過搭車，又要周圍搵的士。芭堤雅基本上都可周圍泊車，而且好多商場都免費泊車的。

大定記住要租COROLLA，唔好租CIVIC，因CIVIC 錶板用液晶顯示，好易睇到油用左幾多，到最後還車時，要CHECK油針就蝕底了。最後提提，曼谷去芭堤雅120公里，大約1小時15分鐘到啦。

帶住小朋友，最好行程就係動物園。呢個動物園好大，可以自己揸車入去，想睇咩就停低架車慢慢睇，如無租車，都可租高球車。

仲可以餵小動物，又可近距離接觸鹿仔，一個唔錯的親子活動。

當然去芭堤雅要去珊瑚島啦。去到碼頭，一定有船家叫你包快艇去，來回大約$625港幣，算合理，一架快艇可坐十人左右，15-20分鐘就到達。珊瑚島有好多水上活動玩，但大家盡量唔好玩水底漫步，因為D泰仔唔知輕重，好大力咁扯你落水底，好易整到條頸椎，到時有咩事就無謂了。

提提大家兌換泰銖，在機場先換幾百銖，足夠高速公路收費。到了芭堤雅再兌，匯率高好多的。